​Захирлаасаа асуух 7 асуулт

2019/03/22 Админ 5680 1 сэтгэгдэл

 

Хэдий захирал биднийг сонгож ажилд авдаг ч, тэнд ажиллах эхний сонголтыг хийдэг хүн бол бид өөрсдөө билээ. Тэр хүнийг сонгож, удирдуулан, түүнээс суралцаж, карьер хөөн амжилттай ажиллахаар төлөвлөж байгаа бол дараах асуултыг түүнээс заавал асууж тодруулаарай.


Таны чин зорилго юу вэ?

Та хоёр нэгэн зорилгын дор нэгдэн ажиллаж байгаа. Ямар зорилго гэж үү? Хэрвээ юуны төлөө ажиллаад байгаагаа, бас өөрийнхөө хүсэл тэмүүллийг одоогоор олоогүй байгаа бол түүнээс цаашдын алсын харааных нь тухай тодруулж мэдээрэй. Түүний зорилгод өөрийнхөө зүгээс хэрхэн хувь нэмрээ оруулж чадахаа хэлэх хэрэгтэй. Мөн түүнчлэн өөрийнхөө мөрөөдлийг ч хуваалцаж, ямар ажлуудыг голчлон авахыг болон аль талаараа өсөхийг хүсч байгаагаа хэлээрэй. Захирал хүн ажилчдынхаа юу хүсдэгийг мэддэг байх ёстой.


Ажлын үр дүнгээс юу хамгийн чухал вэ?

Зарим дарга ашиг орлогыг хамгийн түрүүнд тавьж ажилладаг бол зарим нь зөвхөн хийж байгаа зүйлийн үр дүнг чухалчилдаг. Юуг нэн тэргүүнд чухалчилж үздэгийг нь мэдэхийн тулд чиний цаашид хийх ажлаас ямар үр дүн хүлээж байгааг нь асууж мэдэх хэрэгтэй. Хэрвээ түүний ажлын үнэт зүйл чинийхтэй хол зөрж байвал, өөрийнхөө бодол баримталдаг байр суурийг ч бас хэлэх нь зүйтэй. Тэгвэл цаашид үүсэх зөрчлүүдээс сэргийлэх боломжтой.


Санал хүсэлт гарвал танд яаж хэлвэл зүгээр вэ?

Ямар нэг санал хүсэлт гарвал түүнийгээ хэрхэн илэрхийлж байвал захиралд чинь нийцтэй, боломжтой байхыг асуу. Зарим хүн ажил хэргийн тал дээр шууд ярихыг зөв гэж үздэг бол, зарим нь шулуухан хэлсэн үгийг сөргөлдөөн гэж ойлгодог. Чөлөө авах хүсэлтийг хүртэл өргөдлөөр авахаар шаарддаг дарга байхад, амьдралын хүнд асуудал тохиолдвол ний нуугүй ярилцахыг ажилтнуудаасаа хүсдэг дарга ч бий шүү дээ.


Яагаад намайг ажилд авсан бэ?

Энэ асуулт маш чухал. Чиний CV, ярилцлагаас ямар дүгнэлт хийснээр сонгон ажиллуулах болсныг нь мэдвэл чамаас юу хүсэн хүлээж байгаа нь тодорхой болно. Мөн ингэснээр чамайг өөрийнхөө анзаараагүй байсан давуу талыг мэдэж, түүнийгээ цаашид өсөн дэвшүүлж хөдөлгөх хүч болгоход тусална.


Таны удирдлагын арга барилаас юуг анхаарч мэдэх хэрэгтэй вэ?

Хүн бүр аливаа зүйлийг хийхдээ өөрийн тогтсон арга барилтай байдаг. Миний мэдэх нэг дарга хүн ууртай үедээ хүнийг бүтэн нэрээр нь дууддаг юм. Тэр хүн илүү цагаар ажиллаж байгаа хүнийг урамшуулахын оронд цагаа зөв зохицуулдаггүй гэж үздэг ч байж болно. Эсвэл оройны 5 цагаас хойш хэлсэн хүсэлтийг хүлээж авдаггүй ч байж мэднэ. Магадгүй чи түүнийхийг сонсоод гайхах байх. Гэхдээ л зайлшгүй мэдэж, бэлтгэлтэй байх зүйлсийн нэг.


Түүний амьдралын зарчим юу вэ?

Бенжамин Франклин өөрийнхөө амьдралдаа 13 зарчмыг чандлан баримталдаг байжээ. Тэдгээрийн нэг нь “Хүний санаа бодол ярьж байгаа шигээ цэвэр ариун байх ёстой” юм. Тийм ч учраас тэр шударга бус, үг нь үйлдлээсээ зөрдөг хүмүүстэй хамтарч ажиллахаас үргэлж татгалздаг байсан гэдэг. Түүний баримталдаг зарчмыг асуу. Аливаа хүн өөрийн зарчмын дагуу ажил хэрэг, амьдралаа авч явдаг. Юмыг яаж мэдэх вэ, чинийх түүнийхээс зөрвөл хамт ажиллахад хэцүү байж мэдэх юм.


Чиний карьерийн төлөвлөгөө түүнийхтэй хэрхэн нийцэж болох вэ?

Ямар ч хүн өөртөө хэрэгцээтэй зүйлийг хийж, бий болгохыг хичээдэг. Яг л үүнтэй ижил түүний юунд хүрэхийг хичээж байгаа талаар нь мэдэж өөрийнхтэйгөө уялдуулж болох тухай ярилцаж үз. Чамайг зорилгоо мэддэг гэж үнэлнэ.

 


СЭТГЭГДЭЛ
АНХААРУУЛГА: Манай сайт ХХЗХ-ны журмын дагуу зүй зохисгүй зарим үг хэллэгийг хязгаарласан тул бусдын эрх ашгийг хүндэтгэн үзнэ үү.
0/500 тэмдэгт
НИЙТ СЭТГЭГДЭЛ (1)
Zochin [202.126.89.183] 2019/03/27
Goy medee bn bayarlalaa
Сүүлд нэмэгдсэн
Их уншсан
Видео инфографик
Бүх видео

Маркетингийн мэдээ, мэдээлэл авах

Та дижитал маркетингийн хамгийн сүүлийн үеийн чиг ханпдлага, дэвшлүүд болон арга техникүүдийн талаар мэдээ, мэдээлэл, зөвлөгөө авах хүсэлтэй бол и-мэйл хаягаа бүртгүүлээрэй. Баярлалаа.